لا طلة بالشباك
ولا ضيء حنين دايب ..!
ليه القمر غايب ؟!!
وين روعة الإحساس
الطيبة واللهفة ؟!!
وين الحرير والماس
وا شوقي للمرفأ
ليك غنت الأجراس
يا روعة يا إلفة
يا واحدة بين الناس
ما كان هواك صدفة ..!
ليه القمر غايب ؟!!!
مستني يا راسي
طلة جبين وخِديد
فرح الهوى الماسي
جنب الـ بريدو شديد
يا بلبلي الغريد
ليل الشتات قاسي
والزول حبيبو بعيد ..!
ليه القمر غايب ؟!!
..............
محمد بدوي حجازي
شندي - 18 اكتوبر 2023
بَاكِر يفتِّق ويشْدَهِكْ
وإنتي الحُزُن مَا بِشْبَهِكْ
مَا بِشْبَهِكْ ..!
لا الدَّمْعَة لا ليل الحَرِب
يا الشَّايلة من شَرقِك غَرِب
الرَّجْعة مِن نُصَّ الدَّرِب،
مَا بِتَشْبَهِك ..!
لمَّا انْهَزم، طَاش الفُؤاد
واتوشَّح الكون بالحَداد
صُوتك صَدَح، سَال المِدَاد
طَالِع من النَّار والرَّمَاد
وإنتِي الحُزُن مَا بِشْبَهِك ..!
رَغْم الصِّعَاب، رَغْم الظٌّرُوف
سَامِع غُنا النَّاي العَطُوف
مَا القَلبِ قَبل العين بِشُوف
وإنْتِي الحُزُن مَا بِشْبَهِك ..!
حَافِظ عُهودك يَا جَمِيل
وحَافِظني في الليل الطَّوِيل
لِي غيري غُصْنَك مَا بِمِيل
وإنْتِي الحُزُن مَا بِشْبَهِك ..!
..........
الخرطوم - فبراير 2022م
وين الطَّلة ؟!
وينو قمرنا الـ غَاب ما هَلَّا
وينـَا عيون حلوين رَيَّانـة
فيهم سِر الحـُسن اتجلَّى
وين الخَد النـَّاير راسم
أزْهَى ورود نشوانة وفُلـَّة
وأحلى لِهيج تسكرني حروفو
وطعم الشَّهد بالرَّوعة مَحَلَّا
مُشتاق ليك با بِت ضَوَّاية
وأحلى شتيلة دَلالها ودَلَّا
وإنتَ بعيد ما عَارف حَالي
وأنا غرقان وَحْيَاتك والله
مَليان بيك بالرَّيد وعذابو
وعَطَش الرُّوح أضناني وعَلَّا
ومَروا سنين مستنـِّي وِصَالك
وفي نيران الشـَّوق بَتْقـلَّا
وحبَّك زاهر رغم صدودك
يا المَريود يا الغالي اتغلَّا
مستنيك وبُعادك طَوَّل
وما استناني العُمـُر الـ ولَّى
..............
الخرطوم - يناير 2022م
خطوات عيونك دافيـة
زي ورد ابتسـم
وجمـال غُناكِ
مَسارو جُـوّة الرّوح سـلام
زَهَا واترسم
لوَّحتَ ليك ، لوَّحتي لي
سالت مَسَارْب الرُّوح نَغـَم
مدّيت يميني على الصَّباح
قالَدني والليل انهزم
شبح العَسَس، رِيحة الفُـراق
ومدينة الخوف والعَـدَم
إنَّ الذين نُحبـَّهم
رحلوا نجوماً للقمـم
كلَّ الذين تخاذلوا
ماتوا على دين "الوَهَم"
