ليه القمر غايب

ليه القمر غايب ؟!! 

لا طلة بالشباك 

ولا ضيء حنين دايب ..!

ليه القمر غايب ؟!!

وين روعة الإحساس

الطيبة واللهفة ؟!!

وين الحرير والماس

وا شوقي للمرفأ

ليك غنت الأجراس 

يا روعة يا إلفة 

يا واحدة بين الناس 

ما كان هواك صدفة ..!

ليه القمر غايب ؟!!!

مستني يا راسي 

طلة جبين وخِديد   

فرح الهوى الماسي  

جنب الـ بريدو شديد 

ارحم تعال آسي 

يا بلبلي الغريد 

ليل الشتات قاسي 

والزول حبيبو بعيد ..!

ليه القمر غايب ؟!!

..............

محمد بدوي حجازي

شندي - 18 اكتوبر 2023

قرَّبني أكتر

دربك أخضر

يا قمر طربان بيسهر

يا الشِتيلة الـ رامية عنبر

كل كلمة نجيمة طاعمة

وكل نظرة حليوة سُكَّر

 

يا صباح الخير وفالو

يا جميل يا أسما أسمر

يا حلاة بسمة خديدك

ويا غلاتو صباك أزهر

وكل يوم زايد غلاوة

وكل يوم أشواقي أكبر

فرَّ توب الليل جناحو

وكلْ جميل لي عشو بَكَّر

نحنا إيه من غير محبة

وإيه نكون لو شوقنا ودَّر؟!!

وكم قواسي الدنيا طالت

وبالمحبة تهون وتقصَر

وعارف إني قريب وغالي

بس بقول : قرِّبني أكتر ..!

......................

الخرطوم - يناير 2023م