مَا بِشْبَهِـك

عُيون بِنياتِك صَباح

 بَاكِر يفتِّق ويشْدَهِكْ

وإنتي الحُزُن مَا بِشْبَهِكْ

مَا بِشْبَهِكْ ..!

لا الوَجْعة لا هَمَّ القَلِب

لا الدَّمْعَة لا ليل الحَرِب

يا الشَّايلة من شَرقِك غَرِب

الرَّجْعة مِن نُصَّ الدَّرِب،

مَا بِتَشْبَهِك ..!

لمَّا انْهَزم، طَاش الفُؤاد

واتوشَّح الكون بالحَداد

صُوتك صَدَح، سَال المِدَاد

طَالِع من النَّار والرَّمَاد

وإنتِي الحُزُن مَا بِشْبَهِك ..!

رَغْم الصِّعَاب، رَغْم الظٌّرُوف

شَايِف النِّسيمات بيك تَطوف

سَامِع غُنا النَّاي العَطُوف 

مَا القَلبِ قَبل العين بِشُوف

وإنْتِي الحُزُن مَا بِشْبَهِك ..!

حَافِظ عُهودك يَا جَمِيل  

وحَافِظني في الليل الطَّوِيل 

غَنّوك كُتَار يَا زول نَبيل 

لِي غيري غُصْنَك مَا بِمِيل

وإنْتِي الحُزُن مَا بِشْبَهِك ..!

..........

الخرطوم - فبراير 2022م

وين الطَّلة

وين الطَّلة ؟!

وينو قمرنا الـ غَاب ما هَلَّا

وينـَا عيون حلوين رَيَّانـة

فيهم سِر الحـُسن اتجلَّى 

وين الخَد النـَّاير راسم 

أزْهَى ورود نشوانة وفُلـَّة

وأحلى لِهيج تسكرني حروفو

وطعم الشَّهد بالرَّوعة مَحَلَّا 

مُشتاق ليك با بِت ضَوَّاية

وأحلى شتيلة دَلالها ودَلَّا

وإنتَ بعيد ما عَارف حَالي 

وأنا غرقان وَحْيَاتك والله

مَليان بيك بالرَّيد وعذابو 

وعَطَش الرُّوح أضناني وعَلَّا 

ومَروا سنين مستنـِّي وِصَالك

وفي نيران الشـَّوق بَتْقـلَّا

وحبَّك زاهر رغم صدودك

يا المَريود يا الغالي اتغلَّا 

مستنيك وبُعادك طَوَّل 

وما استناني العُمـُر الـ ولَّى 

 ..............

الخرطوم - يناير 2022م 

كَنـْدَاكَة

وجِئتـُك في الزَّمانِ البخيل

فالطُّغاةُ الوالِغُـونَ في الدَّمِ

لا يَعرِفونَ الحُبَ

لا يَسمعُونَ أَغَانِي "الخَلِيل"

وليلُ الطُّغاةِ طَوِيلٌ،  طَوِيل 

تقودُهُـم شَهوةُ المُلْـكِ نَحو النِّهاية

فكلُّ الطُّغاةِ يُعيـدونَ ذَات الحِكَاية 

ويُغرقُونَ الليلَ بالدَّمِ والخَوفِ والمَنـَايا

ثُمَّ تكونُ نِهايتَهُم والخِتامَ الذَّليل ..!

 

جَمِيلةٌ أنتِ يا حَبيبتي

نَبيلةٌ في هـَواكِ النَّبيل 

جَليلةٌ حِينَ تُشْهِرينَ الهُتـافَ الجَليل

عَيناكِ طَاقتانِ نَحوَ النَّهار 

نَجمتَانِ في دَياجي القِفـَار 

نافذتانِ يَرى مِنهُما الصَّغَار

شُرفةَ الغـَدِ وشَدو السـَّلام الجَميـل ..!

جَميلةُ أنتِ، ثَوْرَة

وكُلُّ الطُّغاةِ والمُجرمونَ والفَاسدونَ

والمُخْبِرونَ الصِّغـارِ عَوْرَة

وأَنتِ، أَنتِ الثـَّورة

بَريقُ النَّيـاشين عَوْرَة

شُيـُوخُ السلاطينِ عَوْرَة 

وُجُوهُ المُطَبـِّعيـنَ عَوْرَة

هَروَلةُ الطَّامِعيـنَ عَوْرَة 

صَمْتُ الخَانِعِيـنَ عَوْرَة 

"الخُبَرا الإسْتِرَاتِيجيينَ" عَوْرَة

بُؤسُ العِقـَالاتِ، خُبـْثُ الخَواجـاتِ،

كُلُّهُمْ مَحـْضُ عَوْرَة 

وأَنتِ، أَنتِ وَحدُكِ الآنَ،

وَحدُكِ ثَوْرَة ..!

...............

الخرطوم - يناير 2022م 

سالت مسارب الرُّوح نغم

 خطوات عيونك دافيـة
زي ورد ابتسـم
وجمـال غُناكِ
مَسارو جُـوّة الرّوح سـلام
زَهَا واترسم
لوَّحتَ ليك ، لوَّحتي لي  

سالت مَسَارْب الرُّوح نَغـَم

 

 
مدّيت يميني على الصَّباح
قالَدني والليل انهزم
شبح العَسَس، رِيحة الفُـراق
ومدينة الخوف والعَـدَم
إنَّ الذين نُحبـَّهم
رحلوا نجوماً للقمـم
كلَّ الذين تخاذلوا
ماتوا على دين "الوَهَم"

ومشينا خطوات، حيلي فيك
سايقين غناوي النور رَزَم
نجمين ودنياهم ربيـع
بالبهجة والحب مُتهَم
شايفين جمال في كل خيال
لامس قلوبهم والتزم
شايفين صباح باهي وقريب
من بين مسارات الألم
 

"عَزَّة" الجميلة،
الشايلة من القَمْـرَة توب
الشاربة من النيل شمم.
...............
الخرطوم - يناير 2022