قريب زي بسمـة في الخاطـر
وزي فرحة عُيـون النـُّور
في صفحة خِـديـد نايـر ..!
هَداك باكر ...
ملاذ الشوف ولمحـة أمسنا الزَّاهـر
ونِحنـَا قـُراب
خطاوينـا المـدى السـَّاحـر
غناوينـا المُنـى الوافـر
نِحنـا قـُراب
يا قـادرات ويا قـادرين ويا قـادر
يقالـِد كل زول بي اسمـه
ويتوسـَّد نِجيمات السـَّنـا الباهـِر
هَداك باكـر ...
بي دم جوفنا حصَّنـاهُ
واتقاسمنـا جمرات الهـوى الماطـِر
وادرَّقنـا بالإيمـان والإنسـان
واتحزَّمنا بي توب الغنـا الدافـر ..!
هَداك باكر ...
يناغم حلمنـا البـَرَّاق
يسامر عزمنـا الساساق
يزغرد في الوجع آفـاق
ما كان الحصاد رقـراق
ولا نشوة حلم عابـر ..!
هداك باكر ...!
.............
الخرطوم - فبراير 2019م
