ما تخبـِّي الرّيد، ما تداري الشّوق
ما تبقى بخيل، يا سِيد الذّوق
تمضي الساعات في عُمُرْنا تسوق
والفرح الرَّاح ما تقول ملحوق
وتفوت أيام، ليلات وشروق
ما برجع يوم شان يرضي عشوق
قول لو مشتاق: الشّوق، الشّوق
عيش الأفراح زخـَّات وبروق
ما تداري هواك، اليوم مسروق
- يا أجمل فال - والحظ ممحوق
لو إنتَ حزين، خاطرك مخنوق
بُوح، قول الرَّيد، والرّيد معتوق
مالكني هواك وأنا بيكا مشوق
ارحمني وبُوح يا بان ممشوق
شايفك محتار وتقول لي: روق .!
كيف يهدأ هواي وأنا بيك مشروق؟!
يا أجمل كون، يا "كنْ معشوق"
من فيض النُّور بالحب مخلوق
ما تخبـِّي الرّيد، ما تداري الشّوق
ما تبقى بخيل يا سيد الذّوق.
......................
الخرطوم - مارس 2021
